ಕನ್ನಡಮ್ಮ

images (2)

 

 

ಆರು ಕೋಟಿ ಮಕ್ಕಳ ತಾಯಿ ಕನ್ನಡಮ್ಮ

ಇವಳ ಸ್ಥಿತಿಯ ನಾನೇನೆಂದು ಹೇಳಲಮ್ಮ

 

57 ವಸಂತಗಳ ಕಳೆಯುತಿಹ ತಾಯಿ

ಇವಳ ಬಹು ಮಕ್ಕಳದು ಬರಿಯ ಬಡಾಯಿ

ಬೆರಳೆಣಿಕೆಯ ಮಕ್ಕಳಿಗಷ್ಟೇ ಗೊತ್ತು ಇವಳ ಪಾಡು

ಬಹು ಮಕ್ಕಳು ಸೇರಿಹರು ಬೆಚ್ಚನೆ ಗೂಡು

 

ಇವಳ ಸೆರಗಂಚೆಲ್ಲಾ ಹರಿದು ಹಂಚಿದೆ

ನೋಡಿದಲ್ಲೆಲ್ಲಾ ತೇಪೆ ಹಚ್ಚಿದೆ

ಪರರ ಮಕ್ಕಳು ಊಳಿದಿಹ ಸೀರೆ ಹರಿಯುತಿಹರು

ಬಹು ಮಕ್ಕಳೆಲ್ಲಾ ಸುಮ್ಮನೆ ನೋಡುತಿಹರು

 

ಪರರ ಮಕ್ಕಳದೇ ಎಲ್ಲಾ ಕಾರುಬಾರು

ಬಹು ಮಕ್ಕಳೆಲ್ಲಾ ಇವರ ದಾಸರು

ಕೆಲ ಮಕ್ಕಳಷ್ಟೇ ತಾಯ ಮಾನ ಕಾಪಾಡಹತ್ತಿಹರು

ಆಗಲಿ ಇವರ ಕೈ ಬಲ ಪಡಿಸುವುದಕ್ಕೆ ನಮ್ಮ ಕರಾರು

 

ಇಂದಿನ ಕನ್ನಡದ ಸ್ಥಿತಿ ನೋಡಿಯೂ ನೋಡದಂತಿರುವವರೇ ಬಹು ಮಕ್ಕಳು

ಅವಳ ಕಷ್ಟವರಿತು ಕಾಪಾಡಲು ಮುಂದೆ ಬಂದಿರುವವರೇ ಕೆಲ ಮಕ್ಕಳು …

 

ಎಲ್ಲ ಓದುಗರಿಗೆ ಕನ್ನಡ ರಾಜ್ಯೋತ್ಸವದ ಶುಭ ಆಶಯಗಳು

ಛದ್ಮ ವೇಷಧಾರಿಗಳು

disguise

ಅನುಕಂಪವ ಗಳಿಸಲು

ನಗುವ ತಡೆದು ಅಳುವರು
ಕೆಲವೊಮ್ಮೆ
ಮನದಳಲ ಮರೆತು ನಗುವರು

ಮನೆ ಹೊಗುವರು – ಹೊಗೆದು
ಆಳಬಯಸುವರು
ಮನವ ಹೊಕ್ಕು
ವಿನಾಕಾರಣ ಆಳಿಸುವರು

ತಡಕಾಡುವರು
ಮನದಲಿ ಮಿಡುಕುವರು
ಹೃದಯವ ತಡಕುವರು
ತಡೆಯಿಲ್ಲದ ಎಡೆಯೂ
ಎಡವುವMತೆ ತಾಕುವರು

ಮನದಿಂಗಿತದಂತೆ ಇರಗೊಡದವರು
ತೊಡುವರ್ಯಾಕೀ ಕೃತಕ ವೇಷ?

ಸೂತಕದ ಭಾವನೆ

ಯಾವುದಾದರೊಂದು ವಿಷಯ ವಸ್ತುವಿಗೆ ಅಂಟಿಕೊಂಡು, ನಂತರದ ಅಲಭ್ಯತೆಯು ಸೂತಕದ ಭಾವನೆ ಮೂಡಿಸುತ್ತಿದೆ

ಹುಡುಕಾಟ

Image

ಸಾಧಿಸಲೇನು ಇಹುದು
ಇಂದು ಅಸಾಧ್ಯವಾದುದು ನಾಳೆ ಸಾಧ್ಯವು
ಮರುದಿನ ಸುಲಭಸಾಧ್ಯವು

ಹುಡುಕುವುದೆಲ್ಲ ಈ ಮುಂಚೆ ಇಲ್ಲಿಯೇ ಇಹುದಲ್ಲವೇ?
ಹೊಸದಾವುದದು ನಾವು ಹುಡುಕುವುದು

ಹುಡುಕುವವರೆಗೂ ಅದು ಹೊಸದು
ಮರುಕ್ಷಣ ಅರಿಯುವೆವು
ಇದು ಈ ಮುಂಚೆಯೇ ಇಲ್ಲಿ ಇತ್ತು ಅಂತ

ಹಾಗಿದ್ದಲ್ಲಿ ನಾವು ಹುಡುಕುವುದು 
ಕತ್ತಲೆಯಲ್ಲಿ ತಡಕಾಡಿದಂತಲ್ಲವೇ?

ಇದಕೆ ಬೇಕೆ ಬುದ್ಧಿವಂತಿಕೆ
ಬೆಳಕು ಸಾಕಲ್ಲವೇ?

ತೆರೆಯಿರಿ ನಿಮ್ಮ ಮನದ ಕಣ್ಣುಗಳನು
ಎಲ್ಲ ಇಹುದು ಇಲ್ಲಿ

ಇಬ್ಬಂದಿ ಭಾವನೆ

ಸಣ್ಣವರೊಂದಿಗೆ ಸಣ್ಣವನಾಗಿ ಸೇರಿದರೆ, ತಲೆ ಮೇಲೆ ಕೂತ್ಕೊಳ್ತಾರೆ ಅಥವಾ ಅವರಿಗಿಂತಾ ಇನ್ನೂ ಸಣ್ಣವನನ್ನಾಗಿ ತಿಳೀತಾರೆ, ತಾವು ಮಾತ್ರ ದೊಡ್ಡವರಾಗ್ತಿದ್ದೀವಿ ಎಂದು ಭಾವಿಸ್ತಾರೆ. ಅವರು ಸರಿ ಅಂತ ನಾನು ಒಪ್ಪಿಕೊಳ್ಳಲಾಗಲ್ಲ, ಯಾಕೆ ಅಂದ್ರೆ, ನನ್ನ ಬೆನ್ನಿನ್ನೂ ಬಾಗಿಲ್ಲ, ತಲೆ ಇನ್ನೂ ಮೇಲೆತ್ತರಕ್ಕೆ ನೋಡುವ ಶಕ್ತಿ ಹೊಂದಿದೆ.

ದೊಡ್ಡವರೊಂದಿಗೆ ದೊಡ್ಡವನಾಗಿ ಸೇರಿದರೆ, ಇಲ್ಲ ಸಲ್ಲದ ತಪ್ಪುಗಳನ್ನು ಹುಡುಕಿ, ಗೌಣವಾಗಿ ಕಾಣ್ತಾರೆ. ಅವರೊಂದಿಗೆ ನಿಲ್ಲಲು ನಾನು ಅಸಮರ್ಥ ಅಂತ ನಿರೂಪಿಸಲು ಹವಣಿಸ್ತಿರ್ತಾರೆ.

ಹೀಗಾದ್ರೆ ನಾನಿನ್ನು ಹೇಗೆ ಉಳಿಯೋದು, ಬೆಳೆಯೋದು?

ಕಾಕಣ್ಣ/ ಮ್ಮ (ಬಾದರಾಯಣ ಸಂಬಂಧಿ)

crowಸುಮಾರು ತಿಂಗಳುಗಳಿಂದ, ನಮ್ಮ ಮನೆಯ ಅಡುಗೆ ಮನೆಯ ಕಿಟಕಿಯ ಹತ್ತಿರ, ಪ್ರತಿ ನಿತ್ಯವೂ ೮ ಘಂಟೆಯ ವೇಳೆಗೆ ಒಂದು ಕಾಗೆ ಬಂದು ಕುಳಿತುಕೊಳ್ಳುತ್ತದೆ.  ಅದಕ್ಕೆ ತಿನ್ನಲೇನಾದರೂ ಹಾಕಲೇಬೇಕು.   ಅಲ್ಲಿಯವರೆವಿಗೂ ಕಾ ಕಾ ಅಂತ ಅರಚುತ್ತಲೇ ಇರುತ್ತದೆ.  ಮೊದ ಮೊದಲಿಗೆ ಬಿಸ್ಕತ್ ತಿನ್ನುತ್ತಿದ್ದದ್ದು, ನಂತರ ಅದು ಬಿಸ್ಕತ್ ಮುಟ್ಟದಾಯಿತು.   ಮನೆಯಲ್ಲಿ ಮಾಡಿದ ಅಂದಿನ ತಿಂಡಿಯೇ ಹಾಕಬೇಕು.  ಅದನ್ನು ಕಚ್ಚಿಕೊಂಡ ಮೇಲೆಯೇ ಹಾರಿ ಹೋಗುವುದು.  ಕೆಲವೊಮ್ಮೆ ಇನ್ನೊಂದು ಕಾಗೆಯೂ ಬರುತ್ತದೆ.  ಪೂರ್ವಜನ್ಮದಲ್ಲಿ ಇದೇನಾದರೂ ನಮ್ಮ ಸಂಬಂಧಿ ಆಗಿತ್ತೇ ಎಂಬ ಅನುಮಾನ ನನಗೆ.  ವರುಷಕ್ಕೊಮ್ಮೆ ಶ್ರಾದ್ಧದ ದಿನ ಪೂರ್ವಜರಿಗೆ ಪಿಂಡ ಇಡುವುದು ವಾಡಿಕೆ.  ಇಲ್ಲಿ ಪ್ರತಿ ನಿತ್ಯವೂ ಅದಕ್ಕೆ ತಿನ್ನಲಿಡಬೇಕು.   ಮನಸ್ಸಮಾಧಾನ ಆಗಲು ಇದೊಂದು ಸದವಕಾಶ ಅನ್ನುವಿರಾ?

ಮತ್ತೆ ಬರಹ

ಬಹಳ ದಿನಗಳಿಂದ ಬರಹದ ಕಡೆಗೆ ಗಮನ ಕೊಡಲಾಗಲಿಲ್ಲ.   ಅದಕ್ಕೂ ಒಂದು ಕಾರಣವಿದೆ.   ಪದೋನ್ನತಿಯ ಕಡೆಗೆ ೩ ವರುಷಗಳ ಕಾಲ ಹಟಪ್ರಯತ್ನ ಮಾಡುವಾಗ, ಬರಹವನ್ನು ಗೌಣ ಮಾಡಬೇಕಾಯ್ತು.  ಕೈ ಹಿಡಿದ ಕೆಲಸ ಮುಗಿದ ಮೇಲೆ, ಮತ್ತೆ ಮನದಲ್ಲಿ ಮೂಡಿದ್ದನ್ನು ಬರಹದ ಮೂಲಕ ವ್ಯಕ್ತ ಪಡಿಸುವುದು ಕರ್ತವ್ಯವಲ್ಲವೇ!   ಇನ್ಮೇಲೆ ಬರಹಕ್ಕೆ ಪ್ರಾಧಾನ್ಯ ಕೊಡುವೆ.

ಕಿಟ್ಟಪ್ಪ ಹೋಗ್ಬಿಟ್ನ

ತೆ! ಅರ್ರೇ! ನಮ್ಮ ಕುಟುಂಬದ ಶುಭ ಕಾರ್ಯವೇ ಆಗಲಿ, ಅಶುಭ ಕಾರ್ಯವೇ ಆಗಲಿ, ಸಾಥಿ ಕೊಟ್ಟವ್ನು ಅಂದ್ರೆ ಕಿಟ್ಟಪ್ಪ. ಆಗೆಲ್ಲ ಹೆಚ್ಚು ತಿಳಿದವನಂತೆ, ಮಾರ್ಗದರ್ಶನ ಮಾಡಿದವನು ಅವ್ನೇ. ನಮ್ಮ ದೊಡ್ಡಣ್ಣನಿಗಿಂತ ಹದಿನೈದು ದಿನಗಳಷ್ಟು ಚಿಕ್ಕವನಾದ್ರೂ, ನಮ್ಮಪ್ಪ ಅಮ್ಮ ದೈವ ಅಧೀನರಾದಾಗ, ನಮ್ಮಣ್ಣನಿಗೂ ದಾರಿ ತೋರಿದವನು. ಅಂತಹವನು ನಮ್ಮ ಸೋದರಮಾವ. ಏನೇ ಶುಭ ಕಾರ್ಯವಾದ್ರೂ, ಅಶುಭ ಕಾರ್ಯವಾದ್ರೂ ಮೊದಲು ಕಿಟ್ಟಪ್ಪನಿಗೆ ತಿಳಿಸ್ಬೇಕು ಅಂತ ನಮ್ಮಮ್ಮ ಹೇಳ್ತಿದ್ರು. ಈಗ್ಯೆರಡು ವರುಷಗಳಿಂದ ನಾನು ಅವನನ್ನು ಭೇಟಿಯಾಗಿರಲಿಲ್ಲ. ಆದರೂ ಮೊನ್ನೆ ಮೊನ್ನೆ ಅವನೊಂದಿಗೆ ಮಾತನಾಡಿದನುಭವ. ಈಗವನು ನಮ್ಮೊಂದಿಗಿಲ್ಲ ಅಂದ್ರೆ ನಂಬೋಕ್ಕಾಗ್ತಿಲ್ಲ. ಮತ್ತೆ ಮಾತನಾಡಿಸ್ಬೇಕು ಅಂದ್ರೆ ಅವನು ನನಗಿನ್ನು ಸಿಗ್ತಾನಾ? ಹದಿನೈದು ದಿನಗಳ ಹಿಂದೆ ಬೆಂಗಳೂರಿಗೆ ಹೋಗಿದ್ದಾಗ ಅವನನ್ನು ಕಂಡು ಮಾತನಾಡಿಸ್ಬೇಕು ಅನ್ನೋ ಬುದ್ಧಿ ನನಗ್ಯಾಕೆ ಬರ್ಲಿಲ್ಲ.
ಅಲ್ಲ ಈಗವನು ಹೋಗಿದ್ದಾದ್ರೂ ಎಲ್ಲಿಗೆ. ಅವನು ಅಂದ್ರೆ ಯಾರು? ನನ್ನ ಮನದೊಂದಿಗೆ ಸಂವೇದಿಸಿದ ಚೇತನ, ಈಗೆಲ್ಲಿ? :(
ನಮ್ಮನೇಲಿ ಅದೇನೇ ಶುಭ ಕಾರ್ಯ ಆದ್ರೂ ನಾಂದಿ ವೇಳೆಗೆ ಸರಿಯಾಗಿ, ಕೈನಲ್ಲೊಂದು ಚೀಲ ಹಿಡ್ಕೊಂಡು ಹಾಜರಾಗ್ತಿದ್ದ. ಅವನಿರೋಷ್ಟು ದಿನಗಳೂ ಗೋಳು ಹುಯ್ಕೊಂಡಿದ್ದು, ಈಗ ಮತ್ತೆ ಬಾ ಅಂದ್ರೆ ಬರ್ತಾನಾ? ಯಾರ ಮುಂದೆ ಹಲುಬುಕೊಳ್ಳಲಿ.

೫-೬ ವರ್ಷಗಳ ಹಿಂದೆ, ಮನಕ್ಕೆ ತೋಚಿದ್ದನ್ನು ಗೀಚಿದ್ದು, ಈಗಲೂ ಸರಿ ಅಂತ ನನ್ನ ಮನ ಹೇಳ್ತಿದೆ. ಅದು ಸರಿಯೇ?

ಎಲ್ಲಿಂದಲೋ ಬಂದ ಈ ಚೇತನಕೆ ಆತ್ಮ ಎನಲೇ
ಎಲ್ಲಿಂದಲೋ ಹುಟ್ಟಿ ಬಂದ ಈ ದೇಹಕೆ ನಾನು ಎನಲೇ

ಜೀವನ ಎಂಬೋ ಈ ಬಸ್ಸಿನಲ್ಲಿ ಎಲ್ಲೋ ಹತ್ತಿದೆ ನಾನು
ಹಾಲುಣಿಸಿ ಪಾಲಿಸಿದವಳ ಅಮ್ಮನೆಂದೆ
ಅವಳು ತೋರಿದವನ ಅಪ್ಪ, ಅಕ್ಕ, ತಂಗಿ, ಅಣ್ಣ, ತಮ್ಮನೆಂದೆ
ಅವಳು ಕಲಿಸಿದ ಮಾತನೇ ನಾ ನಂಬಿದೆ

ಈ ಬಸ್ಸಿನಲಿ ಎಲ್ಲೋ ಹತ್ತಿ ಎಲ್ಲೋ ಇಳಿವ ಸಹ ಪ್ರಯಾಣಿಕರಿಂದ
ಮಮತೆ ವಾತ್ಸಲ್ಯ ಪ್ರೇಮ ಪ್ರೀತಿ ಕರುಣೆ ಕ್ರೋಧ ಹಾಸ್ಯವ ಕಲಿತೆ
ಮಣ್ಣಿನ ವಾಸನೆತೆ ಮನದ ಕಾಮನೆಗಳಿಗೆ ದಾಸನಾದೆ
ಯಾವುದೋ ಹೆಣ್ಣಿನ ನಂಬಿದೆ, ಕೆಲ ಬಾರಿ ಮೋಸ ಹೋದೆ

ಸಹವರ್ತಿಗಳೊಡನೆ ನಕ್ಕೆ, ನಗಿಸಿದೆ, ಅತ್ತೆ, ಅಳಿಸಿದೆ
ಅವರನೇ ನಂಬಿ ಗೋಂದಿನಂತೆ ಅಂಟಿದೆ
ಅವರ ಸ್ಥಾನಕದಿ ಅವರಿಳಿಯೇ ಗೋಳಾಡಿ ಹೊರಳಾಡಿದೆ
ಆಸ್ತಿಕ ನಾಸ್ತಿಕನಂತೆ ನಾಟಕವಾಡಿ ದಿಕ್ಕಾಪಾಲಾಗಿ ಓಡಿದೆ

ಸಹವರ್ತಿ ತೋರಿದ ಕೂಸುಗಳ ಮಕ್ಕಳೆಂದೆ
ಅವರನೇ ನಂಬಿ ಆಶಾಗೋಪುರ ಕಟ್ಟಿದೆ
ಅವರು ಕೈ ಚೆಲ್ಲಿದಾಗ ಹುಚ್ಚನಾದೆ, ಎಲ್ಲರ ಶಪಿಸಿದೆ
ಕೊನೆಗೊಂದು ದಿನ ಬಂದಲ್ಲಿಗೇ ಇಳಿದು ಹೋದೆ

ಬ್ಯಾಂಕ್ ಬ್ಯಾಲೆನ್ಸು

ನಾನೊಬ್ಬ ಏದುಸಿರು ಬಿಡುತಿಹ ಕಲ್ಲಿದ್ದಲು ಉಗಿಬಂಡಿ
ನನ್ನ ಬಳಿ ಎಂದಿಗೂ ಸುಳಿಯಲಿಲ್ಲ ಬಂಗಾರದ ಗಿಂಡಿ
ಟ್ಯಾಕ್ಸು ಪಾಕ್ಸು ಮುರಿದು ಮಾಹೆಯಾನ ಬರುತಿಹುದು —– ರೂಪಾಯಿ
ಚಾತಕದಂತೆ ತಾರೀಖು ಒಂದಕೆ ಕಾದು ಬಿಡುತಿಹೆ ನಾ ಬಾಯಿ ಬಾಯಿ

ಬರುವುದರಲಿ ಒಂದು ಪಾಲು ಕೈ ತುತ್ತನಿಟ್ಟ ಆ ತಾಯಿಗೆ
ಇನ್ನೊಂದು ದೊಡ್ಡ ತುತ್ತು ನನ್ನ ನಂಬಿದ ನನ್ನ ಮಕ್ಕಳ ತಾಯಿಗೆ
ಹೆಚ್ಚಿನ ಖರ್ಚಿಗೆ ಗಟ್ಟಿಯಾಗಿರುವುದು ಸಾಲ ಕೊಡುವ ಸೊಸೈಟಿ
ಉಳಿಸುವ ಮಾತೇ ಇಲ್ಲ ಈ ನನ್ನ ಸರಕಾರದ ಖಜಾನೆಯಲ್ಲಿ

ಮುಚ್ಚಿದಷ್ಟೂ ಮತ್ತೆ ಮತ್ತೆ ತೆರೆದುಕೊಳ್ಳುವ ಖರ್ಚಿನ ಬಾಬ್ತುಗಳು
ಭೂತ ತೃಪ್ತಿಗಾಗಿ ಹೊಸ ಹೊಸ ಯೋಜನೆಯ ಸಾಲಗಳು ( ಭೂತ ಅಂದ್ರೆ ಹೊಟ್ಟೆ )
ಇದೆಲ್ಲದರ ನಡುವೆ ಅನುಭವ ಆಗುತಿಹುದುದ ಅಭಾವ ವೈರಾಗ್ಯ
ಅದೇಕೋ ಸುತ್ತ ಮುತ್ತಲಿನವರೆಲ್ಲ ಹೇಳುತಿಹರು ನಾ ಅಯೋಗ್ಯ

ನಾ ಚಿರಂಜೀವಿ ಆಗಲು ಸಾಲ ಕೊಟ್ಟ ಮಂದಿ ಪ್ರಾರ್ಥಿಸುತಿಹರು
ಎಮ್ ವಿ ಸಿ ಎಂದು ಸೊಸೈಟಿಯವರು ಎನಗೆ ಬಿರುದಿತ್ತಹರು
( ಮೋಸ್ಟ್ ವ್ಯಾಲ್ಯೂಡ್ ಕಸ್ಟಮರ್ )
ಸಾವಿರಾರು ಮಂದಿಗಳ ನಂಬಿಸಿ ಮೋಸ ಮಾಡಲಾದೀತೇ
ಅದಕಾಗಿ ಹೊಸ ಹೊಸ ಯೋಜನೆಗಳ ರೂಪಿಸುತಿಹೆ

ಮತ್ತೆ ಕಾಯುವೆ ಮುಂದಿನ ತಿಂಗಳ ಒಂದನೇ ತಾರೀಖಿಗೆ
ಆನಂದ ತುಂದಿಲನಾಗಿ ಬೀಗುವೆ ಅಂದೊಂದು ದಿನವೇ
ನನ್ನ ಹತ್ತಿರವೂ ಇದೆ ಬ್ಯಾಂಕ್ ಬ್ಯಾಲೆನ್ಸು
ಆದರದು ಎಲ್ಲರಂತಹದಲ್ಲದ ಡೆಬಿಟ್ ಬ್ಯಾಲೆನ್ಸು

ನನಗಿಷ್ಟವಾದ ಹಾಡು
ಒಂದರಿಂದ ಇಪ್ಪತ್ತರವರೆಗೆ ಉಂಡಾಟ ಉಂಡಾಟ
ಇಪ್ಪತ್ತೊಂದರಿಂದ ಮೂವತ್ತರವರೆಗೂ ಭಂಡಾಟ
ಸಂಬಲ ತೇದಿ ಒಂದರಿಂದ ಇಪ್ಪತ್ತರವರೆಗೆ ಉಂಡಾಟ ಉಂಡಾಟ


ಮರಳಿ ಬರಹದೆಡೆಗೆ

ಮರಳಿ ಬರಹದೆಡೆಗೆ

ಬಹಳ ಸಮಯದಿಂದ ಬರಹದಿಂದ ದೂರವಾಗಿದ್ದೆ. ಅದೇನೋ ದೊಡ್ಡದಾಗಿ ಸಾಧಿಸೋಕ್ಕೆ ಅಂತ ಹೋಗಿ, ಮುಗ್ಗಿರಿಸಿದವಗೆ, ಮರಳಿ ಮಣ್ಣಿನ ಮನೆಯೇ ಸೇರ್ಬೇಕು ಅಂತ ವಿಧಿಯಾಗಿದೆ. ಇನ್ನು ಮೇಲೆ ಮತ್ತೆ ಮನದ ತುಮುಲವನ್ನು ನಿಮ್ಮೊಡನೆ ಹರಡಿಕೊಳ್ಳುವೆ, ಹಂಚಿ ನನ್ನ ಮನವನ್ನು ನಿರಾಳ ಮಾಡಿಕೊಳ್ಳುವೆ.

ಗುರುದೇವ ದಯಾ ಕರೊ ದೀನ ಜನೆImage

« Older entries

Follow

Get every new post delivered to your Inbox.

Join 694 other followers